robis di viodi

Clamade “fontane grande”, cheste vascje di piere monolitiche, che si cjate tal mieç dal paîs e che e je datade 1697, e je tra i “monuments” plui impuartants dal comun.

In plui de Parochiâl dal votcent intitulade a Sant Nicolau e fate sù di Girolamo D’Aronco di Glemone, pari dal innomenât Raimont, a Damâr si pues lâ a viodi ancje la Glesie di Sant Valentin, une costruzion di fature semplice che e va indaûr al 1600 e la Gleseute votive de Maine, tornade a fâ sù dopo dal taramot dal 1976.

Si pues rivâ a chest lagut, che al è un sfuei di aghe artificiâl, lant jù de strade statâl par une stradute che e passe denant dal mulin vieri Rainis. Il lagut al è adatât par fâ la pescje sportive o ben par cjaminâ cun trancuilitât su lis sôs spuindis cjalant cigns e razis che a corin a fîl di aghe.

Un salt di aghe di cualchi desene di metris al da vite a cheste pissande sugjestive che e cor vie dentri di un foran de mont Mariane.

Al è il lât naturâl plui grant dal Friûl Vignesie Julie e aprûf des sôs spuindis, tes domeniis cjaldis vie pal Istât a rivin vacancîrs e int dal puest par cjapâ soreli, par fâ mirinde e par polsâ te ombrene sot dai arbui.

La Plêf di Sant Stiefin e je stade fate sù suntune alture, pôc lontan dal paîs, e tal passât e je stade doprade ancje come pont di difese e di control. Vuê la costruzion e à ancjemò lis liniis semplicis dal Sietcent in gracie de ricostruzion atente che e je stade fate dopo dal taramot. Sot de glesie si pues lâ a viodi un piçul Antiquarium che al mostre, midiant di un interessant percors espositîf, la storie dal puest e de costruzion religjose.

Fat sù suntun cret che si distache di cirche 1000 metris des rivis setentrionâls de Mont di Sant Simion, il fuart de Mont di Feste al è stât ogjet di une difese lezendarie par permeti la ritirade des trupis talianis de Zone Cjargne inte prime vuere mondiâl.

Tumieç –Place Mazzini Di origjin medievâl, ma tornade a fâ sù dal dut tal 1700, la Glesie di Sante Catarine e je, di simpri, un pont di riferiment religjôs e sociâl pai abitants di Tumieç.

Il Domo di Sant Martin al rapresente l’edifici religjôs plui impuartant de citât. Fat sù tal Sietcent, al merete une visite ancje dentri, dulà che a son conservadis oparis dai pitôrs venits Fontebasso, Novelli e Diziani e ancje la serie dai Apuestui, fate dal plui grant pitôr cjargnel dal Sietcent, Nicola Grassi.

Cul so patrimoni di ogjets e documents cetant siôr al è un dai plui grancj museus etnografics a nivel European. Lis colezions, midiant di documents e di ricostruzions, a presentin un aspiet impuartant de societât cjargnele dal XIV al XIX secul.

Poiât dentri dal centri storic tal borc vieri de roie, par difûr l’aspiet di Palaç Frisacco (XVIII) al è rindût zentîl par vie des liniis semplicis fatis tal Sietcent, des profiladuris in piere sculpide dai barcons e dal porton de jentrade. Par une vore di timp al è stât la sede de canoniche. Vuê, dopo de ristruturazion, fate dopo dal taramot dal 1976, al è destinât a centri espositîf civic par mostris di art.

Pôc sore de citadine, da pît de Mont Strabût, si jevave il cjistiel o ben il palaç patriarcjâl. Al jere cenglât cuntune fuesse de bande de mont e cuntune muraie che e sierave i lûcs vicins lant jù fin a val. Tra il 1477 e il 1479 e fo fate sù la Tor Picote par difindi il borc e il cjistiel de menace dai Turcs. Lant sù a pît di vie Cascina, une strade laterâl di vie Rome, si pues rivâ a Pra-Cjistiel, dulà che al jere il Cjistiel e po si rive sù te Tor Picote. Di culì la viste e domine su dut il paisaç che al è ator e su la citât stesse.

Residence antighe de famee Janesi che e pues jessi stade fate tal XV-XVI secul, e rapresente une des pocjis sorevivencis di edilizie civîl tarde medievâl presintis in citât. La façade, cumò di muradure cu lis pieris a viste, in origjin e veve di jessi cuvierzude di afrescs cun motîfs gjeometrics. Al reste cualchi segn tai tocs conservâts te part alte de façade. A son une vore carateristichis lis biforis cul arc formât di trê arcuts plui piçui e tignudis sù di colonutis in stîl gotic venezian.

Il Borc di Dieç al è spes clamât “il paîs dai arcs” par vie che culì a son tantis cjasis cun puartis o ben portâi fats a forme di arc, ma Dieç al conserve ancje altris particolaritâts artistichis e architetonichis scomençant des testemoneancis archeologjichis cjatadis fûr sot des glesiis di Sant Florean, di Sant Pauli e di Sant Vît e dongje de zone clamade Cjistiel dal Broili, fintremai ai mulins dal Sîscent. Un di chescj, il Mulin dal Flec, al funzione ancjemò in dì di vuê.

Fate sù intun puest frecuentât fin dal periodi pre-roman, la glesie e fo tornade a fâ sù tal XVI secul e i tornarin a meti man tal 1856. Dentri e à doi altârs in len di buteghe cjargnele fats tal 1700 e un batisteri in piere sculpide.

Al è un dai ambients naturâi plui interessants de Cjargne. Un troi naturalistic, furnît e prontât cun panei didatics, i permet al visitadôr di traviersâ dute la zone caraterizade di trê grandis torberis e di une varietât vegjetâl cetant siore.

Il flum Arzin al da vite a une schirie di pissandis une vore sugjestivis. I salts di aghe, cenglâts di boscs di faiâr vivarôs, si dan la volte cun vascjis di erosion e pocis fondis e cetant verdis.

Il lât di Vergegnas al è un piçul ma inmagant spieli di aghe di origjin artificiâl incalmât tal cûr di une val verdissime. Lant pal puint che i passe parsore si pues cjapâ il troi dilunc vie pes rivis dal lât o ben, lant indenant su pe strade di rive sù, si pues rivâ li de Madone “da Saleta” (di La Salette) e tai borcs di Dueibas e Pusea.

Lis struturis e i reperts cjatâts tal sît archeologjic dal Cuel di Maceit a sigurin une frecuentazion umane di cheste zone a scomençâ dal IV mileni p.d.C. fin ae Ete di Mieç. E propit a chest ultin periodi a van indaûr i rescj, che si puedin viodi benon, di une tor di vuardie che e fâs part di une struture fortificade plui grande.

La Plêf di Sant Martin e je stade torade a fâ sù des fondis e slargjade tal secul XVIII (tra il 1730 e il 1778) daûr dal progjet dal architet tumiecin Domenico Schiavi. Passât il puarti de jentrade, il cuarp de glesie al è dividût in trê navadis. Furniments e afrescs preseâts dal 1700 a completin il didentri.

Percors ben furnît che al puarte a discuvierzi la antighe gjave di marmul ros: si trate propit di un museu di archeologjie industriâl a cîl viert, fat recuperant percors e manufats che a fasevin part dal antîc procès di estrazion dal marmul.

A Vila Egidio Marzona, colezionist di art contemporanie, al à metût sù l’Art Park, un parc particolâr di art contemporanie dulà che a son ospitadis oparis di artiscj come Bruce Neuman, Richard Long, Sol LeWitt, Dan Graham, Robert Berry, esponents di nomee internazionâl di corints culturâls leadis ae Art Puare, ae Land Art e al Minimalisim.