CJAVAÇ

Tra il grop di monts dal Faeit e il flum Tiliment si slargje il teritori di Cjavaç. Viers misdì al da sul Lât di Cjavaç o ben Lât dai trê Comuns, il bacin naturâl plui grant dal Friûl Vignesie Julie. Il lât al è nomenât pe prime volte intun document dal XIII secul. Cun chest document il patriarcje di Aquilee al da in man il teritori e lis sôs aghis a un nobil di Glemone e lu invide a furnî di pes lis mensis patriarcjâls.

La storie di Cjavaç, scomençant dal non stes dal lûc, si incrose in maniere une vore strente cun chê dal lezendari castrum Cabatium, une struture fortificade che si jevave su la crete di Cesclans, dulà che cumò e je la plêf di Sant Stiefin. Puest strategjic par buine part de Ete di Mieç, al à vût un pês di rimarc pal control des viis di comunicazion tra la planure e la Cjargne.